Kuri uyu Munsi w'Icyumweru, ku itariki ya 08 Gashyantare 2026, mu Bitaro bya Ruhengeri habereye Ibirori byo Kwizihiza Umunsi Mpuzamahanga w'Abarwayi, wateguwe ukanshyirwa mu bikorwa ku bufatanye na Diyoseze ya Ruhengeri.

Insanganyamatsiko y'uyu Mwaka iragira, iti: "Impuhwe z'Umunyasamariya: Gukunda Wakira Ububabare bw'Undi". 

Uyu munsi witabiriwe n'Abayobozi mu Nzego zitandukanye,  Ababafatanyabikorwa, Amadini n'Amatorero, Amahoteli, Amatsinda y’Abagiraneza, Abarwayi, Abarwaza n’Abakozi b’ibi Bitaro, Umushyitsi Mukuru akaba yari Guverineri w'Intara y'Amajyaruguru biherereyemo, Bwana MUGABOWAGAHUNDE Maurice. 

Abaturage mu ngeri zitandukanye bari babukereye

Abitabiriye bakiriwe n'Umuyobozi Mukuru w'Ibitaro, Dr.MUHIRE Philbert, iyi gahunda ikaba yaranzwe n'ibikorwa bitandukanye byabimburiwe n'Igitambo cya Misa cyatuwe na Nyiricyubahiro Umwepiskopi wa Diyoseze ya Ruhengeri, Musenyeri Visenti HAROLIMANA. 

Umuyobozi Mukuru w'Ibitaro mu ijambo ry'ikaze

Mu Misa: mu gihe cyo Gutura

Nyuma y'Igitambo cya Misa, habaye ibiganiro n'impanuro byibanze ku Mavu n'Amavuko y'uyu Munsi Mukuru w'Abarwayi, kwishimira ubufatanye bw'Inzego mu Kurushaho Kuzamura Imibereho Myiza y'Abaturage no Kwihutisha Iterambere, binyuze mu Miyoborere Myiza y'Igihugu cyacu. Bati: “Roho Nziza mu Mubiri Muzima!”

Nyiricyubahiro Musenyeri atanga impanuro

Guverineri agaruka ku mahirwe Abaturarwanda bakesha Imiyoborere Myiza

Aha, Guverineri akaba yasabye akomeje ubufatanye mu kurwanya ibyaba icyanzu cy'indwara cyose aho kuva kikagera, by'umwihariko umwanda, inzoga z'inkorano, ibiyobyabwenge, ihohoterwa rikorerwa abana, kudatangira Umusanzu w'Ubwisungane mu Kwivuza ku gihe, ... 

Yasoje agaruka ku kibazo cy'Ibitaro Bishya bikomeje gutegerezwa na benshi abizeza ko bashonje bahishiwe.

Umuhango wa nyuma ukaba wabaye uwo gusura, gusangira n'abarwayi ndetse no kubaha impano banabifuriza gukira vuba.

Umurwayi NDAYAMBAJE na we, mu izina rya bagenzi be, ati: “Ndashima cyane Imitangire ya Serivisi muri ibi Bitaro muri rusange na Muganga Joseph AYIMANA by'umwihariko!"

Serivisi y'Ababyeyi ni imwe mu zasuwe